Mae Prifysgol Abertawe wedi dod i Femorandwm Cyd-ddealltwriaeth gydag Adran Gwybodeg Feddygol Sefydliad Ymchwil St John, fel rhan o Academi Gwyddorau Iechyd Cenedlaethol St John. Cynhaliwyd seremoni’r Memorandwm yn Sefydliad Ymchwil St John yn ninas Bangalore, India. Ffurfiwyd y bartneriaeth newydd er mwyn arwain India ym maes addysg ac ymchwil gwybodeg iechyd.

Dr Tony D. S. Raj, Rev Dr Paul Parathazham, Prof David Ford ac Associate Professor Tony Paget.

Bydd y Memorandwm yn galluogi’r ganolfan addysg gyntaf o’i math yn India sy’n arbenigo mewn gwybodeg iechyd i gael ei sefydlu yn Sefydliad Ymchwil St John yn Bangalore, mewn partneriaeth ag Ysgol Feddygaeth Prifysgol Abertawe. Hefyd, mae’r ddau sefydliad wedi datblygu cysylltiadau newydd i gryfhau gwaith ymchwil gwybodeg iechyd yn eu gwledydd, y DU ac India, trwy lofnodi’r Memorandwm heddiw.

Dywedodd yr Athro Cyswllt Tony Paget, arweinydd Addysgu Gwybodeg Iechyd Ysgol Feddygaeth Prifysgol Abertawe: “Yn sgil y trefniant unigryw hwn, gall y ganolfan addysg yn St John gynnig cyfle i fyfyrwyr sy’n byw yn India astudio ar gyfer MSc dwy flynedd Ysgol Feddygaeth Prifysgol Abertawe mewn Gwybodeg Iechyd - heb orfod teithio i’r DU. Bydd yr un cyfle ar gael i’w chwaer-gwrs maes o law - y MSc mewn Gwyddor Data Meddygol.”

Astudio trwy dele-bresenoldeb byw:

Bydd y cyrsiau’n cael eu cyflwyno gan dîm addysgu gwybodeg iechyd Ysgol Feddygaeth Prifysgol Abertawe trwy ddysgu tele-bresenoldeb amser real, ynghyd â’r myfyrwyr sy’n astudio ym Mhrifysgol Abertawe yn y DU, gan gydweithio’n agos â’r tîm yn yr Adran Gwybodeg Feddygol yn Sefydliad Ymchwil St John.

Bydd y ganolfan addysg yn St John yn derbyn y myfyrwyr cyntaf o India a fydd yn astudio ar gyfer cwrs MSc dwy flynedd Prifysgol Abertawe mewn Gwybodeg Iechyd yn fuan.

Bydd y myfyrwyr sy’n astudio yn India trwy’r ganolfan addysg yn St John yn cael eu dyfarnu â gradd Prifysgol Abertawe ar ôl cwblhau’r cwrs yn llwyddiannus.

Ychwanegodd Dr Tony Raj, Deon Sefydliad Ymchwil St John a Phennaeth yr Adran Gwybodeg Feddygol: “Rydym wrth ein boddau i ffurfioli’r bartneriaeth â Phrifysgol Abertawe a’i Hysgol Feddygaeth, sydd yn y 3 uchaf yn y DU, i gyflwyno addysg gwybodeg iechyd yn St John yn India. Nod y Memorandwm yw gweithio tuag at ddatblygu proffesiwn gwybodeg iechyd yn India, i roi cyfle newydd sbon i weithwyr proffesiynol sy’n gweithio yn y sector iechyd a gofal iechyd yn India ddilyn gyrfa mewn gwybodeg iechyd.”

Dywedodd yr Athro David Ford, Athro mewn Gwybodeg Iechyd sy’n arwain y grŵp Gwybodeg Iechyd yn Ysgol Feddygaeth Prifysgol Abertawe: “Rydym wrth ein boddau yn creu’r bartneriaeth gyffrous newydd gyda’n cydweithwyr yn Sefydliad Ymchwil St John. Gyda’n gilydd, gallwn gynnig cyfle dysgu rhagorol i fyfyrwyr yn India gan ddefnyddio dull addysgu cwbl unigryw.

“Hefyd, bydd y bartneriaeth yn sail berffaith ar gyfer amrywiaeth o weithgareddau ymchwil gwybodeg iechyd, lle bydd ein sgiliau, profiad a diddordebau yn gwbl gyflin, a fydd yn ein gosod ymhlith y grwpiau arweiniol ym maes gwyddor data iechyd sy’n dod i’r amlwg.”