Sylwer bod y dudalen hon wedi cael ei harchifo ac nid yw'n cael ei diweddaru mwyach.
Yr wythnos nesaf, caiff cyflawniadau dros 1,800 o fyfyrwyr israddedig ac ôl-raddedig eu dathlu yng nghynulliadau graddio Prifysgol Abertawe.
Cynhelir cynulliadau'r gaeaf, ar gyfer myfyrwyr sydd wedi cwblhau eu hastudiaethau'n llwyddiannus ers mis Gorffennaf 2017, yn Neuadd Fawr Campws y Bae o ddydd Llun 8 Ionawr i ddydd Mercher 10 Ionawr.
Bydd teuluoedd a ffrindiau'r myfyrwyr yn bresennol hefyd, yn ogystal â swyddogion y Brifysgol, staff academaidd, cynrychiolwyr Undeb y Myfyrwyr a swyddogion a phwysigion dinesig.
Bydd darpar-raddedigion yn derbyn eu graddau o:
• Goleg y Celfyddydau a’r Dyniaethau, yr Adran Addysg Barhaus Oedolion, y Coleg Peirianneg, y Coleg Gwyddoniaeth, ac Ysgol Feddygol Prifysgol Abertawe ar ddydd Llun.
• Yr Ysgol Reolaeth a Choleg y Gyfraith Hillary Rodham Clinton ddydd Mawrth.
• Coleg y Gwyddorau Dynol ac Iechyd ddydd Mercher.
Meddai'r Athro Richard B. Davies, is-ganghellor Prifysgol Abertawe: "Hoffwn estyn fy llongyfarchiadau cynhesaf i'n myfyrwyr sy'n graddio, a dymunaf bob llwyddiant iddynt yn y dyfodol.
"Mae gennym hanes balch o baratoi myfyrwyr ar gyfer llwyddiant personol a phroffesiynol eithriadol ers 1920. Gobeithio y bydd y graddedigion eleni'n gallu parhau i ymfalchïo ym Mhrifysgol Abertawe, wrth i ni barhau i adeiladu ar lwyddiant ysgubol y blynyddoedd diweddar”.
Mi fydd modd gwylio’r holl seremonïau yn fyw ar ein gwefan.
- Dydd Iau 4 Ionawr 2018 16.23 GMT
- Dydd Gwener 5 Ionawr 2018 10.29 GMT
- Catrin Newman